現年27歲嘅歌手吳業坤出名異性緣極旺，近日仲竟然「跨過界」跨過年齡界限同67歲嘅薛家燕傳出母子戀！兩「母子」因為共赴台灣做嘢而「日久生情」，吳業坤被爆對家燕媽媽呵護備至，唔只成日噓寒問暖，仲夜媽媽話去家燕嘅酒店房傾劇本，連「家燕姐」都唔叫，直呼「家燕」，嚇到家燕媽媽受寵若驚！
而前日（21日）無綫頒獎禮上，兩人「情侶檔」行紅地氈時，薛家燕畀裙襬Kick住，吳業坤即上前英雄救美，母子戀傳唔停！ 
嗌「我的家燕寶寶」
一波未平一波又起，同佢哋一齊去台灣嘅王梓軒就喺Instagram上載咗條片，留言：「究竟有幾情迷家燕姐？？」片中佢就話發生咗樣都幾恐怖嘅事，佢大爆吳業坤成日影低家燕媽媽飲完水，水杯上嘅唇膏印，王子軒話：「佢Close up影呢啲囉，然後就話『我的家燕寶寶』！」家燕媽媽都直言受寵若驚，而吳業坤就笑吟吟唔出聲！ 
憑歌寄意
對於緋聞，吳業坤就喺Instagram留言：「讓理智在叫著（着）冷靜冷靜 還恃住年少氣盛 讓我對著（着）衝動 背著（着）宿命 渾忘自己的姓」仲tag住「沉睡的兇猛在甦醒」、「完全為你現形」、「如若早三十年相見」，呢幾句說話其實係陳奕迅首歌《無人之境》嘅歌詞，不過佢就改寫咗「如若早三五年相見」呢句，真係幾應景！而網民都笑言：「你咪整蠱阿燕啦！」、「人地（哋）好多人追架（㗎）你算把啦！」、「你向阿媽交代咗未？」真係成地花生呀！ 
本文轉載與東網
如有侵權請聯系刪除
